Maurice Roy, Oeuvres Poétiques de Christine de Pisan, I, Paris, 1886 (repr. 1965), pp. xiv-xvii:

Trés excellent, de grant haultesse
Couronnée, poissant princesse,
Trés noble roÿne de France,
Le corps enclin vers vous m'adresce 4
En saluant par grant humblece;
Pry Dieu qu'il vous tiengne en souffrance
Lonc temps vive, et après l'oultrance
De la mort vous doint la richece 8
De Paradis, qui point ne cesse,
Et au monde sanz decevrance
Paix, joye et toute recouvrance
De quanqu'il affiert e leece. 12

Haulte dame, en qui sont tous biens,
Et ma trés souvraine, je viens
Vers vous, comme vo creature,
Pour ce livre cy que je tiens 16
Vous presenter, ou il n'a riens,
En histoire n'en escripture,
Que n'aye en ma pensée pure
Pris ou stile que je detiens 20
Du seul sentement que retiens
Des dons de Dieu et de nature,
Quoy que mainte aultre creature
En ait plus en fait et maintiens. 24

Et sont ou volume compris
Plusieurs livres es quieulx j'ay pris
A parler en maintes manieres
Differens, et pour ce l'empris 28
Que on en devient plus appris
D'oÿr de diverses matieres,
Unes pesans, aultres legieres,
A qui se delitte ou pourpris 32
Des livres, qui maint ont en pris
Fait monter et prendre manieres
Belles; si doit on avoir chieres
Escriptures, non en despris. 36

Car, si que les sages tesmoignent
En leurs escrips, les gens qui songnent
De lire en livres voulentiers,
Ne peut qu'aucunement n'eslongnent 40
Ygnorence, que ceulx ressongnent
Qui de sens suivent les sentiers,
Si en valent mieulx ceulx le tiers,
Voire plus qui s'en embesongnent 44
Et qui la peine ne ressongnent
D'apprendre, il n'est si beaulx mestiers
Ne qui face gens si entiers,
Quoy que les folz, peut estre, en grongnent 48

Si l'ay fait, ma dame, ordener
Depuis que je sceus qu'assener
Le devoye a vous, si qu'ay sceu
Tout au mieulx et le parfiner 52
D'escripre et bien enluminer,
Dès que vo command en receu,
Selons qu'en mon cuer j'ay conceu
Qu'il faloit des choses finer 56
Pour bien richement l'affiner
A fin que fust apperceü
Que je mets pouoir, force et sceu,
Pour vo bon vueil enteriner. 60

Dont vous plaise, trés haulte et digne,
Le prendre en gré, tout soye indigne
Que mon euvre estre presentée
Vous doye, mais vostre benigne 64
Condicion qui ne decline
D'umilité, trés redoubtée
Dame, tout soiez hault montée,
Ne vous seuffre en fait ne en signe 68
Que ne soyez, comme roÿne
Doit estre, humaine et arrestée;
Et pour ce ne me suis doubtée
Que vous l'ayés a ce termine. 72

De mon labour et lonc travail
Du livre que mes en vo bail,
Qui contient grant euvre et penible,
Combien que peut estre g'y fail 76
En maint lieux parce que je vail
Trop pou en sens, bien est possible,
Ne vueillez pas, dame sensible,
Pour tant prendre garde au deffail, 80
Mais a ce que je me travail
Voulentiers de ce que possible
M'est a faire en chose loisible,
Qu'a haulte gent voulentiers bail. 84

Si suppli en conclusion,
Haulte dame d'atraction
D'empereurs de digne memoire,
Qu'en benigne devocion 88
Vous plaise mon entencion
Prendre en gré, qui loyale et voire
Est et sera, et si notoire
Ceste mienne posicion 92
Vous soit qu'a tousjours mencion
Soit de mey en vostre memoire
Si que vostre grace m'avoire
Qu'ayés a moy affection.